Biblioteca

La biblioteca de l'ALLA ye un espaciu pal estudiu llingüísticu especializáu del asturianu y l'eonaviegu. A esti fondu filolóxicu, amiéstase-y una coleición, cola mesma vocación de totalidá, de les lliteratures feches n'asturianu y n'eonaviegu y, yá como complementu necesariu, un apartau d'estudios sociales y culturales d'Asturies. Poro, ye una biblioteca especializada n'asturianística, n'espoxigue y revisión constantes. Complementariamente, tamién recueye obres filolóxiques de referencia y dalgunos títulos lliterarios y socioculturales n'otres llingües y sobre otres realidaes llingüístiques.

La compra sistemática de novedaes y obres d'interés y les donaciones d'autores y coleicionistes son les fontes qu'alimenten esta biblioteca. Asina, pol volume y la calidá de la coleición, l'Academia quixo distinguir col so propiu emblema'l «Llegáu Martín Sevilla», una esbilla d'obres que la familia del desapaecíu profesor Martín Sevilla Rodríguez donó a l'Academia de la Llingua Asturiana col envís de ponela al algame d'estudiosos y públicu en xeneral.

Serviciu de consulta de la biblioteca

L'Academia de la Llingua Asturiana pon la biblioteca a disposición del públicu siempre con cita y n'horariu d'apertura del llar. Pue consultase tol fondu.