Académiques y académicos

“L’Academia de la Llingua Asturiana compondráse d’un máximu de venticinco académicos o académiques de númberu y d’un númberu indetermináu d’académicos o académiques correspondientes y d’honor” (artículu 4.1 de los Estatutos de l’ALLA).

Anguaño l’Academia tien ventitrés miembros de númberu, venticuatro correspondientes y diecinueve d’honor. Los primeros son los que, en Plenu de l’ALLA, con voz y votu, dirixen los pasos de la institución. Los miembros correspondientes puen collaborar nos llabores académicos estipulaos pola Xunta de Gobiernu. Les académiques y académicos d’honor, emblemes y proteutores sociales de la entidá, son persones a les que l’Academia reconoz un serviciu destacáu a la llingua y la cultura d’Asturies o a la propia institución.

Toes estes persones rescamplen por una dedicación fonda al estudiu y el cultivu de les disciplines académiques humanístiques (filoloxía, llinguaxe, llingüística o filosofía), pero tamién sociales (antropoloxía, historia, educación o economía), a les ciencies naturales o al campu xurídicu. La mayoría nació o vive n’Asturies, pero tamién hai miembros de l’ALLA procedentes d’otres partes del dominiu llingüísticu asturianu o, inclusive, que dende llueñe texeron una gran rellación cola realidá asturiana. Les sos edaes van de los 30 a los 92 años y entá siguen n’activo 8 miembros fundacionales de la institución (1981). Nin la condición d’académica/u nin los cargos desendolcaos na ALLA conlleven pagu económicu nengún.

Na Presidencia recai la representación pública de la institución.